Shakespeares Sonnets in Romani

Сонэто 049

Др одо дывэ́с (явэ́ла ли коли́?),

Сыр ґалыём бы: мрэ доша́ дыкхэ́са,

Тро камлыпэ́н лангала прэ ровли́,

Набут змэки́, о счёто [43] вытховэ́са…

Др одо дывэ́с, коли́, гэи́ пашыл,

Якхэ́нца ма́нгэ кхам на бичявэ́са,

Коли́ тро татыпэ́н ячела шыл,

О камлыпэ́н ту ма́ндыр закэдэ́са…

Др одо дывэ́с подрикира́ва пэс,

Пхэна́ва: о бэрша́ дохана ман,

Ґазда́ва васт, со мэ кэрдём бангэ́с,

Палсо́ ту чячюнэ́с ман чюрдэя́н.

Пирэ́ годы, нашты́ тэ на́ чюрдэ́с,

Со тэ камэ́с дрэ ма́ндэ на латхэ́с.

Сонэто 050

О пхаро дро́м ман выпия́ сарэ́са,

Рода́вас, соб кай трэ́би дорэстём;

Со мо́л откхиныбэ́н, и ту шунэ́са:

«Бут километры тутыр подгиндём».

О грай кхино́, сыр мро ило́, пхарэ́с,

Сыр на́ками, миро́ ило́ лыджя́лас,

Мэ на сыгякира́вас цыпорэ́с,

Мири́ годы́ сыс дур, ман туга халас.

Ёв на кандэ́лас мирэ пусадя́,

Нэ гаравэ́лас хорэды́р холы́;

Сыр ёв, кхино́, киркэ́с ґондя́ дыя́,

Дукх ма́нгэ дэ́лас буты́р зоралы́.

Уса́ ґондя́ шуна́вас адалэ́:

Мри тугица — англал, мри бахт — палэ́.

Сонэто 051

Ту на́ кош да цыпо́с, камлы́, манга́в:

Прэ лэ́стэ тутыр локхорэ́с трада́вас;

Кай сан, палсо́ бы одотхы́р тэ джя́в?

Сыр рисёва́вас бы, на домэка́вас.

Сыр отпхэнэ́лпэ сыго тэ праста́л?

Сыр сыго на́ джя, на́сыг сыкадёла,

Мэ па́ва́ва лэс, соб тэ урня́л,

Сыр э балва́л, про штэтыцо — дыксёла.

Мро камлыпэ́н грэн ачявэ́л палэ́,

Сарэ́ндыр учеды́р коли́ барьёла:

Ничи́ на скэрна сыва йо калэ́,

Коли́ на ма́с — э яг джиды хачёла.

Гэи́ криг тутыр, грай ґэра тырдэ́лас,

Кэ ту праста́ва, соб ёв отачелас!

Сонэто 052

Сыр барвало́, конэ́скиро клыды́н,

Коли́ ками́, ко кучипэ́н мэкэ́ла,

На чя́стэс джя́ла тэ дыкхэ́л, со сын,

Ёв дрэ якха́ э бокх барьякирэ́ла…

О свэ́нки гудлэды́р, сыр нанэ́ бут,

Дуй вэ́сны тэ явэ́н дро бэрш нашты́,

Сыр лачё бар, дыкха́в начястэс тут,

Сарэ́ндыр кучеды́р дрэ ангрусты́.

Тут рикирэ́ла, сыр дрэ тыкнори́,

Э судьба, сыр куч и́дя, гарадя́,

На чястэс ма́нгэ дэ́ла бахтори́,

Соб тэ дыкха́в тут го́жэс откэрдя́.

Ракх тут Дэвэ́л, пал тыро́ гудлыпэ́н,

Сыр битыро́ — пал дужакирибэ́н.

Сонэто 053

Со сы дава́, савэ́стыр сан скэрды́,

Сыр шэл шэла муя́ ту парувэ́са?

Дрэ ка́жно три патри́н напаруды́,

Сави́ патри́н ту пэ́скэ выкэдэ́са?

Адо́нисо — пашэ патри́н тыри́,

Сыр момэлы́ пашо кхам надыкхны́,

Елена сыс э шукарны́ бари́,

Дрэ тутэ ёй вави́р сы налатхны́.

Э вэ́сныца, о барвало́ лына́й

Шука́р тут сыкавэ́на кхэтанэ́,

Ваш гожыпэ́н ту сан сыр о хула́й,

Сарэ́ муя́ сы тукэ дорэснэ́.

Дрэ тутэ ка́жно гожыпэ́н дыкхно́,

Нанэ́ екх тутэ — ило́ чячюно́.

Сонэто 054

Шукарэды́р сы до шукарипэ́н,

Коли́ лачякирдо́ сы гудлыпна́са!

Сыр бахтяки́рна ро́зыцы амэ́н,

Нэ гудлэды́р, коли́ лэн куч сунга́са.

Адя́кэ ж лулудя́ кирнэ́ тэрдэ́,

Дыксёна сыр о ро́зыцы сунги́тка.

Мэк сы дрэ и́дя го́жэс уридэ́,

Балва́л кирнёла лэ́ндыр лынаи́тко.

На кэ́рна бахт илэ́нгэ — хоханэ́,

Шутёна — дылыно́ сы пхурдыпэ́н;

Коли́ ж мэрэ́на ро́зы чячюнэ́,

Амэ́нгэ арома́то ачявэ́н.

Мэк тэ шутёл шука́р тро тэрныпэ́н,

Дрэ мри гилы́ джидёл тро чячипэ́н.

Сонэто 055

Муя́ крали́тка до совнакунэ́,

О мра́моры — хасёна дрэ мэля́,

Тырэ́ якха́ шука́р сы хачинэ́

Пирэ́ шэла́ бэрша́ дрэ мрэ гиля́.

О марибэ́н пхаги́рла да муя́,

Шука́р фэлатина́ тэлэ́ пэрэ́н,

Дрэ холямэ́ яга́ на хасия́

Гилы́, кай сы тыро́ шукарипэ́н.

О мэрибэ́н тэ бокхалы́ холы́

Ґэрэ́нца тасавэ́са, дорэсэ́са:

Чявэ́нгирэ якхэ́нца — бахталы́,

Палатуно́ Дывэ́с ту удыкхэ́са.

Дрэ мри гилы́ сыр лэ́са тэ дживэ́с,

Буты́р дрэ мрэ якха́ ачя́в ту пэ́с.

Сонэто 056

Камлы́, нэвэ́ зорья́са ман облэ́,

Буты́р бокха́тыр екх ваврэ́с кама́са,

Сам камлыпна́са дадывэ́с чялэ́,

Нэ атася́ бокха́тыр, хай, мэра́са.

Ададывэ́с тыри́ бокх камады́

Дрэ трэ шука́р якха́, хай, мурдэя́,

Нэ атася́ палэ́ сы хачкирды́,

Бут на́ чярав ла, со́бы рисия́.

Сыр бут бэрша́, екх битыро́ дывэ́с,

Сыр мо́рё машкир брэ́ги надыкхнэ́,

Про брэ́го коли ма́н дужакирэ́с,

Сыр удыкха́спэ го́жэс дуйджинэ́!

Сыр зы́ма битыро́, нэ о лына́й

Трин мо́лы татэды́р, сыр ту ада́й.

Сонэто 057

Сом тыро ро́бо, [44] со мэ тэ кэра́в?

Дужакира́ва, сыр кхарэ́са ман,

Ада минуты, сыр кэ ту бэша́в,

Тырэ́ лава́, савэ ухтылла кан.

Мэ на коша́ва тут, дужакира́ва,

Дыкхи́, сыр трэ мардэ́ [45] на́сыгэс джял,

Мэ киркипна́стыр битыро́ мэра́ва,

Коли́ ту протрадэ́са ман кхэра́л.

Мэ на пучя́ва, са́нас ту конэ́са,

Мэк мро ило́ марэ́лпэ захало́,

Мэ сом тро ро́бо, ма́нгэ на пхэнэ́са,

Кон сы вави́р, кон туса бахтало́.

Камло́ — сыр дылыно́: лэс хохавэ́са,

Нэ ёв патя́ла корорэ́ илэ́са.

Сонэто 058

Дэвэ́л на дэ́ла, ман кэри́ робо́с,

Соб тэ пучя́в, бельвель сыр пролыджя́с?

Пиро́ мардэ́ — конэ́са откхинёс?

Соб ту пало́ сками́нд робо́са джяс!

Дэ́ тэ мэра́в илэ́скирэ бокха́тыр,

Кари́к ками́, урня́са ту псиро́;

Дужакири́ дрэ дукх тут бельвеля́тыр,

Ни ла́в ни паш — мэ, ро́бо сом тыро́.

Джино́м: сан акадя́кэ залыны́,

Со кокори́ кэрэ́са пэ́скэ пла́но,

Камэ́са со, конэ́с? — сан хуланы́,

Ладжя́ тыро́ ило́ нисы́р на ха́на.

Дужакири́ дро а́до, [46] мэ шара́ва

Трэ бельвеля́: куч, грэ́хо ль — на дыкха́ва.