Изборник. Памятники литературы Древней Руси

Многу же беду и многу напасть и кровь проливаему всегда зряще мучащейся во обители чюдотворца — паче же по последнем сем третием приступе на выласках, — и побивающе множество градских у добытиа дров за градом…

И мнозем руце от брани престаху: всегда о дровах бои злы бываху. Исходяще бо за обитель дров ради добытиа, и во град возвращахуся не бес кровопролитна. И купивше кровию сметие [1459] и хврастие [1460], и тем строяще повседневное ястие [1461]. К мученическим подвигом зелне себе возбужающе, и друг друга сим спосуждающе. Иде же сечен бысть младый хвраст, ту разсечен лежаше храбрых возраст. И иде же режем бываше младый прут, ту растерзаем бываше птицами человеческий труп. И неблагодарен бываше о сем торг: сопротивных бо полк со оружием прискакаше горд. Исходяще яже нужницы [1462], да обрящут сивеницы, за них же, и не хотяще, отдааху своя зеницы. Текущим же на лютый сей добыток дров, тогда готовляшеся им вечный гроб.

Во вратех же убо града всегда входятце [1463] и исходящей сретающе, глаголаху сице: «Чим, брате, выменил еси проклятыя дрова сиа, другом ли или родителем пли своею кровию?»…

Разрушителю бранем, князю Михаилу, приближшуся х Колязину монастырю… [1464]

Литовские же гетманы и их полковники всеми полки своими устремишяся на руское воинство. И съступишяся обоих полцы, и бысть сеча зла, и сечахуся на многих местех, бьющеся чрез весь день. От оружейново стуку и копейного ломаниа и от гласов вопля и кричаниа обоих людей войска, и от трескоты оружиа не бе слышати друг друга, что глаголет И от дымного курениа едва бе видети, кто с кем ся бьет. И яко зверие рыкающе, зле сечахуся на многих местех, быощеся чрез весь день.

Солнцу же достизающу на запад, и возопишя вси православнии к богу со умилением, вопиюще от сердец своих: «Виждь, владыко, кровь раб твоих, неповинно закалаемых; тако же и ты, преподобие отче Макарие, помолися за ны к богу и помози нам!» И уже близ вечеру сущу, услыша господь молитвы раб своих; и нападе страх велий на врагов божиих; и ужасом великим одержими, в бегство устремишася. И побегошя, друг друга топчюще, гоними гневом божиим. Руские же полци гнашя литовских людей, секуще до Рябова монастыря [1465] и многих литовских людей побили и поранили, и нарочитых панов многих живых поймали. И с великою победою и одолениим возвратишяся под Колязин монастырь со многою корыстию…

И генваря в 12 день гетман Сопега и Лисовской со всеми польскими и литовскими людьми и с рускими изменники побегоша к Дмитрову, никим яже гонимы, но десницею божиею.

Толико же ужасно бежашя, яко и друг друга не ждуще и запасы своя мещуще. И велико богатство мнози по них на путех обретаху, не от хуждьших вещей, но и от злата и сребра и драгих порт и коней. Инии не могуще утечи и возвращающеся вспять и лесы бегающе, прихождаху во обитель к чюдотворцу, и милости просяще душям своим, и поведающе, яко «мнози видешя от нас велики зело два полка, гонящя нас даже и до Дмитрова». Чюдиша же ся вси о сем, яко от обители не бяше за ними никакой посылки…

Легендарная переписка Ивана Грозного с турецким сулатном

В лета 7054-го [1466] году избранному моему ратаю [1467] и тележному поганатаю, [1468] белому Ивану, великому боярину, ясельничему [1469] моему, руской области воздержателю, рускому князю, яко же и сродникома твоим, братома.

Инорога рог, над цари царь, над князи князь, вышняго бога Саваофа [1470] произволением страж гробу Господню и печатник у вышняго престола, великий воин, крепкий вооружник мужеством своим и всем царемъ царь и советник восточныя и северския страны, избранный во царех царь, обнаженный меч неутолимы, гнев возбужденный сердцем, разсудный многим державам, неограженный страхом предложенным, златоточец изообильномъ всяким богатеством, смиренным от вышнего присвоеннымъ милосердием, драгий бисер, светлый на главе венецъ, прозорливый во всея светлости белообразный наказатель, царьских властелин, светильникъ горнего Иеросалима и учитель воинственней силе, храбрый воин, исполненый всякой мудрости, совершенный возрастом, непреклонная гордыня, прекрасный лицем, быстрое зрение очное, вышний закон, ключарь небесный и непокоренным землям турский царь салтан кланяяся и мню радоватися пишу.

Послахом ныне к тебе от своея силы поклисаря, [1471] а с ними сотворих писание о выходные моея казны за 12 летъ, [1472] занеже отцу твоему Василью умершу, а тебе младу сущу после его оставльшуся, и яз до твоего возраста и недосовершенного твоего разума не нудил своея оброчныя казны имати. И яз ныне приказ свой послал к тебе, а велел есми бес пождания казну свою взяти исполнену по прежним книгам отца твоего и по своим поклисарским грамотам.

И ты б, воздержатель руския области, отечеству своему последовал и спрашивал у прежних советников отца своего, которым было мочно ведати, какъ отецъ твой у нашей силы озоброчен был и какъ чтил поклисаров. И аще советники ти истинну изрекут, и ты б поклисаров моих отпущал честных, как им годе не замедливая исполнях. А будет советники твои учнут тя разврачати, и ты б мне изрядно проповедал, да и разум растворил от воздержания создателя своего, да и поклисары от своея власти руския пришли своими угодными речми и с покорением.

А поклисары б твои были превелика разума и смысла, хто б умел с моими паши говорити и смелъ, занеже они у меня превысочайши и велми велика разума и смысла. И по моему наказу всея области моея и нашим советником и разтворенники многим державам в совершенней мудрости вышним Саваофом направляеми великое сокровище в сердцы своем полагают, занеже словеса их страшна суть, какъ моему величеству восхотят, тако и творят.

Вси области силы моея страшатца, камо аз сам двигнуся, туды путь мой прав и покорен. И имянуяся самовластен, не устыжуся никоторые иные державы, развее вышняго Саваофа, потому что наше коли перед нимъ неисправление, в который грех впадем, ино найдет на державу мою страх и неизреченный трепет, земля от него поколебает, а милость его коли к нам придет велика, и яз их тогда всех осеняю своим величеством.

А ис которых царствъ приходят ко мне поклисары, и оне зрети на мой образ не могут: страх великъ обдержит и ужас, занеже лице мое бестудно. И кто может исповедати силы величества моего, или видети великое страхование мое, како аз обладаю всеми державами, а имею аз седалище свое в велицей полате, а очи мои закровенныи. А коли придут ко мне паши мои извещати о чем, и оне до меня не доходят за 20 мер, да понизят главы своя до земля. И яз в те поры учиню очи свои откровенныи, да учну с своими ближними витязи разсужати, кождо им по чему угодно, да и отказ у меня улучат и походят в свою полату и тамъ иншим державам управление учинят по моему приказу. И приезжают в мою область из инших царствъ поклисары и самые градодержцы, и оне гласа моего слышати не могут, занеже державами иншими царствами владею. Дани и оброки мне со всех земель дают, все повинуютца мне и во всем послушание творят предо мною, а роздрания ко мне и сетей на мою державу не чинят, занеже в моей области град нерушимый. Все области удивляютца а моей державе.