Ермак

Да егда убо под Чювашем преста бранное ополчение, рустии ж [людие] утрудишась, и уж бе нощи приспевши. Отоидоша оттуду и обначеваше ту, стражи ж утвердивше крепцыи от поганых, да не яко окоянни ухапят аки змеи.

И не ведаще, яко погании от града изыдоша. На утрии ж вси рустии люди помолившесь Господу Богу и молитву сотворше ко всещедрому создателю своему Богу и к Пречистей его Богоматере, и ополчишась поидоша ко граду Сибири небоязнено. Да яко ж приближишась близ града, и не бе слышати в граде ни гласа, ни послушанья, мняше ж себе, яко скрышась погании з бойством во граде. Но уповаша на Бога, приидоста во град. Приидоста ж Ермак с товарыщи своими во град Сибирь в лето 7089-го октября в 26 день, на память святаго великомученика Христова Дмитрея Селунскаго. И прославиша и благодариша Бога, давшаго такову победу на окаянных идолопоклонник, на огарян, яко бежаша множество их поганых от малочисленаго [воинства; и вси] радостию великою радующеся рустии люди, славяще Бога и Пречисту[ю] его Богоматерь. Достойно бо во истину воспоминати сию на поганых победу, а дараванну[ю] милость Божию к роду крестьянскому и преидушая времена, яко немногими вои таковое пресловущее царьство взято бысть.

По взятии ж Сибири в четвертый день прииде к Ермаку во град Сибирь остяцкой князец имянем Бояр со многими остяки, принесоша ж Ермаку с товарыщи многие дары, мяхкие рухлядь и запасы, яже на потребу. По сем же начаша ту приходити татары многие з женами и [з детми] и начаша жити в первых своих домех, видяш[е], яко покори их Бог православъным крестьяном.

Того ж лета месеца декабря в 5 день Ермакове дружине без опа[сения?…] Иртишем к урочищу, именуется Абалак, а ходит для рыбной ловли ясаул казачей имянем Брюзга с товарыщи. И поставили стан свой, почиша бе[с] стражей, не чаяше на себя нашествия безбожных. Брат же царя Кучюма царевич Маметкул со многими людми пришед на них тай и поби их. Слышано же бысть во граде у Ермака о убиении есаула Брюзги с товарыщи. Ермак же з дружиною своею погнаша вослет поганых и достигоша их. И бысть с погаными брань велика на многь час, погании же на бежание устремишась. Ермак же с товарыщи во град Сибирь возвратися.

Егда ж изволи Бог предати православным крестьяном Сибирскую землю, по взятии, того ж лета Ермак с товарыщи послаша к государю царю и великому князю Ивану Васильевичю всеа Русии к Москве сь сеуньчем атамана и казаков, тут же послан был казак Черъкас Александров потому […] не малой, всего 25 человек. И писали Ермак с товарыщи благочестивому государю царю и великому князю Ивану Васильевичю, всеа Русии самодержцу, что изволением всемилостиваго в Троицы славимаго Бога и Пречистой его Богоматери и великих всеа Русии чюдотворцов молитвами, а его, государя царя и великаго князя Ивана Васильевича, всеа Русии, праведною ко всещедрому Богу молитвою и его царским счастием, его государевы люди, атаман Ермак Тимофеев с товарыщи, царъство Сибирское взяша и многих живущих ту иноязычных людей под его государеву царъскую высокую руку подвели и к шерти их привели, а сибирскаго царя Кучюма и с его детми с Алеем да са Алтынаем да с Ышимом и сь его вои победита и брата царя Кучюмова царевича Маметкула розбиша ж. А иноязычных многих людей татар и остяков и вагуличь привели к шерти по их верам на том, что им быть под его царъскою высокою рукою до веку, покамест […] стояти, и ясак им государю давати по вся годы, а на руских людей зла никакого не мыслить. А которые похотят к государю в его государеву службу, и тем служити его государева служба прямо, недругом его государским не спущать, елико Бог помощи подаст, и самим им не изменить, к царю Кучюму и в ыные орды не отъехать и зла никакого на всяких руских людей не думать, и во всем стоять в прямом постоянстве.

Посланнии ж от Ермака атаман и казаки к Москве приехеша. Поведано ж бысть о том благочестивому государю. И благочестивый государь царь и великий князь Иван Васильевичь всеа Русии слыша сия и повеле отписку принять и вычесть перед своим царским лицем. И егда государь услыша Божию помощ и силу, яко снабдит Господь государство ево и пространство ему дарует и непокоривыя покоряет и повинных сотворяет, и неповинныя и непослушливые повинны бысть, и тогда благочестивый государь царь прослави Бога и Пречистую его Богоматерь и великих московских и всеа Русии чюдотворцов, яко яви ему, государю, таковую превеликую богатую милость: немногими вои таковое царство достиже, а на поганых победа бысть. Ермака же заочно своим государевым жалованным словом пожаловал и похвалил, також и всех ево таварыщей атаманов и казаков. А тех сеуншиков пожаловал государь своим царским многим жалованьем, денгами и сукны. И паки государь отпусти их в Сибирь к Ермаку с товарыщи. И посла государь Ермаку с товарыщи многое свое государево жалованье, сукна и золотые. С ними же государь послал воевод своих князя Семена Волконскаго да голов Ивана Киреева да Ивана Васильева сына Глухова, а с ними казанских и свияских стрелцов сто человек, да пермичь и вятчан сто ж человек, и иных ратных людей 100 человек. А Ермаку указал государь быть к Москве. И Ермак в тое пору убит, покамес сеуншики ездили к Москве.

О убиении Ермакове речется после сих. А как Ермак был жив еще в Старой Сибири до убиения своего:

По сем же прииде во град Сибирь к Ермаку татарин именем Сенбахта и пове[да] Ермаку, что царевичь Маметкул, Кучюма царя брат, стоит на реке на Вагае вверх по Иртишу реке, от града Сибири поприщ 100, а Сибирь город от града Тоболска 15 верст по нынешнему содержанию. Ермак же посла некоторых резвых и искусных ратному делу. Поидоша ж сии воини, и дошедше агарян, и на станы их нападоша нощию, а им спящим, а иным еще убужающимся, и многих поганых побиша. Царевича ж Маметкулова шатра доидоша, и обойдоша его, и яша его жива и со всем богатеством. Приведоша его во град Сибирь к Ермаку с товарищи. Ермак же рад бысть зело, и прият его честно, и поведа ему про государьское величество, и росказывает государево жалованье, и уласкает его ласкосердыми словесы. Царь же Кучюм ожидая к себе брата своего царевича Маметкула многое время, приидоша ж к нему вестницы и поведаша ему, царю, яко пленен бысть царевичь Маметкул. Слыша ж то царь Кучюм, и болезнова о том, и плакася со всем домом своим на много время.